Täze taryhy döwürde eziz Watanymyz durmuş-ykdysady ösüşiň täze tapgyryna gadam basdy. «Garaşsyz, baky Bitarap Türkmenistan  — bedew batly at-myradyň mekany» ýylynyň 23-nji sentýabrynda geçirilen Halk Maslahatynyň taryhy mejlisinde kabul edilen kararlar we öňde goýlan wezipeler bu hakykaty doly äşgär edýär.  Hormatly Prezidentimiziň we Gahryman Arkadagymyzyň çykyşlarynda beýan edilen maglumatlar, öňe sürlen pikirler ýurdumyzyň geljekki on ýyllyklary öz içine alýan strategik ugurlaryny esaslandyrýar. Milli ykdysadyýetiň durnuklylygyny üpjün etmek, innowasion tehnologiýalary önümçilige ornaşdyrmak we hususy pudagyň ornuny ýokarlandyrmak ýurdumyzda ýaýbaňlandyrylan özgertmeleriň ileri tutulýan ugurlarydyr. 

Hormatly Prezidentimiziň ykdysady strategiýasynyň baş ugurlarynyň biri milli ykdysadyýeti diwersifikasiýa ýoly bilen ösdürmek bilen baglanyşyklydyr. Bu syýasat ýurdumyzyň çig mal eksportyna garaşlylygyny azaltmaga, içerki bazarda daşary ýurtlardan getirilýän harytlaryň ornuny tutýan önümleri öndürmäge we eksport mümkinçiliklerini artdyrmaga hyzmat edýär. Şu maksat bilen, ýurdumyzda elektrik energiýasy, nebit we gaz, metallurgiýa, himiýa senagaty, gurluşyk, elektron, dokma hem-de azyk, derman senagaty ýaly köpugurly we biri-biri bilen baglanyşykly halk hojalyk toplumy emele getirildi. Ahaldaky gazdan benzin öndürýän zawod, «Marykarbamid», «Garabogazkarbamid» zawodlary, «Balkan», «Lebap» we «Bäherden» sement zawodlary ýaly iri desgalar diňe bir önümçilik desgalary bolman, eýsem, sebitleriň ykdysady taýdan ýöriteleşmegini we ösmegini üpjün edýän esasy durnukly sütünlerdir. Halk Maslahatynyň mejlisinde bellenilişi ýaly, 2008-nji ýylda döredilen Türkmenistanyň Senagatçylar we telekeçiler birleş mesi 18 ýylyň içinde uly ösüş ýoluny geçip, 30 müňe golaý agzany özünde jemleýän ägirt uly jemgyýetçilik we ykdysady güýje öwrüldi. Birleşmäniň agzalary tarapyndan plastik, metal önümleri, gurluşyk materiallary, dürli himiýa önümleri, haly, elektroenjamlar we azyk harytlaryny öndürýän 1 müň 500-den gowrak senagat ugurly önümçilikleriň döredilmegi hususy pudagyň döwlet maksatnamalaryny ýerine ýetirmekde esasy hyzmatdaşa öwrülendigini görkezýär. Kiçi, orta we iri telekeçiligiň ösdürilmegi içerki bazarda bäsdeşligi artdyrýar, harytlaryň hilini ýokarlandyrýar we elýeterli nyrhlaryň emele gelmegine oňyn täsir edýär.