Häzirki zaman dünýäniň geosyýasy giňişliginde parahatçylygyň, durnuklylygyň we howpsuzlygyň iň ygtybarly nusgasy hökmünde ykrar edilen Türkmenistanyň daşary syýasy ugrunyň esasyny Garaşsyzlyk we hemişelik Bitaraplyk ýörelgeleri düzýär. Döwlet özygtyýarlylygynyň hem-de halkara hukuk ýagdaýynyň bu goşa sütüni bir-biri bilen aýrylmaz baglanyşykly bolup, ýurdumyzyň global giňişlikdäki işjeň diplomatik ornuny şertlendirýär. 1991-nji ýylda gazanylan mukaddes Garaşsyzlyk Türkmenistana özbaşdak döwlet hökmünde daşary syýasatyny milli bähbitlere we umumadamzat gymmatlyklaryna laýyklykda erkin kemala getirmäge taryhy hukuk berdi. Ýurduň geosyýasy we geoykdysady mümkinçiliklerini dogry bahalandyran türkmen diplomatiýasy dünýä bileleşigi bilen gatnaşyklary gurmagyň iň netijeli guraly hökmünde oňyn Bitaraplyk modelini saýlap aldy. 1995-nji ýylyň 12-nji dekabrynda Birleşen Milletler Guramasynyň (BMG) Baş Assambleýasy tarapyndan Türkmenistanyň hemişelik Bitaraplyk hukuk ýagdaýynyň biragyzdan ykrar edilmegi, Garaşsyz döwletimiziň halkara giňişligindäki abraýynyň taryhy dabaralanmasyna öwrüldi. Arkadagly Gahryman Serdarymyz: «Döwletimiziň dünýä bileleşigindäki ornuny berkitmek hem-de halkara abraýyny ýokarlandyrmak boýunça ägirt uly işleri amala aşyrýarys» diýen ajaýyp jümlesi ýurdumyzda Garaşsyzlyk ýyllary içinde içeri hem daşary syýasatda giň möçberli işleriň ýola goýulýandygyny, ata Watanymyzyň ykdysady kuwwatyny ýokarlandyrmakda bähbitli hyzmatdaşlyklaryň alnyp barylýandygyny äşgär edýär. Hakykatdan-da, Garaşsyzlyk ýyllary içinde Türkmenistan hemişelik Bitaraplyk hukuk ýagdaýyna daýanyp, halkara gatnaşyklarynda täze ulag-logistika diplomatiýasynyň nusgasyny kemala getirdi. Döwletimiz özygtyýarly ösüşiniň ilkinji günlerinden başlap, özüniň geostrategik ýerleşişini global derejede parahatçylyga, durnuklylyga we ykdysady integrasiýa hyzmat edýän kuwwatly gurala öwrüldi. Ýewraziýanyň merkezinde, Beýik Ýüpek ýolunyň ýüregindäki taryhy ornuny gaýtadan dikelden Türkmenistan, bu gün dünýäniň iň iri ulag-logistika merkezleriniň biridir. Garaşsyzlyk ýyllarynda Türkmenistanyň daşary syýasatynda ulag-logistika ulgamy diňe bir ykdysady görkeziji bolman, eýsem iri diplomatik strategiýa öwrüldi. Türkmenistanyň başlangyçlary bilen Birleşen Milletler Guramasynyň (BMG) Baş Assambleýasy tarapyndan ulag ulgamyna degişli birnäçe taryhy Rezolýusiýalar biragyzdan kabul edildi. 2016-njy ýylda BMG-niň Durnukly ulag ulgamy boýunça ilkinji Ählumumy maslahatynyň hut Aşgabatda geçirilmegi, türkmen diplomatiýasynyň dünýä ulag syýasatyny kemala getirmekdäki öňbaşçylygyny bütin dünýä subut etdi. Ýurt halkara giňişliginde diňe bir taslamalary maliýeleşdirmek däl, eýsem global howpsuzlygyň kepili hökmünde «ulag diplomatiýasy» diýen täze düşünjäni dolanyşyga girizdi. Türkmenistan döwletimiz içerki ulag düzümini düýpli döwrebaplaşdyrmak bilen birwagtda, yklymlary birleşdirýän halkara geçelgeleriniň we polat ýollaryň gurluşygyny amala aşyrdy. Munuň özi Garaşsyz döwletimiziň dünýä döwletleri bilen ähli babatda işjeň hyzmatdaşlygy, dost-doganlyk gatnaşyklary ýola goýýandygyna güwä geçýär. Şeýle-de, telekeçilige giň orun berilýän döwletimizde telekeçileriň öz önümlerini öndürmäge daşary ýurtly telekeçiler bilen işjeň gatnaşyklary ýola goýmaga giň mümkinçilik döredilýär. Ýagny, türkmen telekeçilerine dünýä bazarlaryna ynamly çykmaga we daşary ýurtly hyzmatdaşlar bilen deňhukukly, uzak möhletleýin işewürlik gatnaşyklaryny ýola goýmaga giň ýol açyldy. Türkmenistanyň Senagatçylar we telekeçiler birleşmesiniň (TSTB) agzalary şu günki günde diňe bir içerki bazary üpjün etmek bilen çäklenmän, eýsem daşary ýurtly hyzmatdaşlar bilen bilelikdäki iri taslamalary amala aşyrýarlar. Türkmen telekeçileriniň daşary ýurtly kärdeşleri bilen biznes-forumlara, sergilere gatnaşmagy ýurdumyzyň ykdysady kuwwatynyň pugtalandyrylmagyna yly ýardam edýär. Soňky ýyllarda ýola goýlan esasy işewürlik ugurlary şulardan ybaratdyr: • Türkmen hususy pudagynyň wekilleri Germaniýanyň, Fransiýanyň, Italiýanyň, Koreýanyň we Ýaponiýanyň öňdebaryjy kompaniýalary bilen tehnologiýa we enjamlar babatda durnukly hyzmatdaşlyk edýärler. • Goňşy Gazagystan, Özbegistan, Eýran we Türkiýe ýaly döwletleriň işewürleri bilen söwda öýleriniň açylmagy, haryt dolanyşygynyň artmagyna getirdi. • Halkara gatnaşyklarynda türkmen telekeçileri diňe bir daşary ýurtdan import edýän tarap däl-de, eýsem dünýä bazaryna ýokary hilli taýyn önümleri hödürleýän ygtybarly hyzmatdaşa öwrüldiler. • Türkmenistanyň hususy pudagynda öndürilýän gurluşyk serişdeleri, sement, dokma, azyk we dökün önümleri bütin dünýäde uly islegden peýdalanýar. • Hususy logistika kompaniýalary daşary ýurtly hyzmatdaşlar bilen bilelikde Kaspi deňziniň, halkara awtobanlaryň we demir ýollaryň üsti bilen multimodal ýük daşamalaryny utgaşykly guraýarlar. Jemläp aýdanymyzda, Garaşsyzlyk we Bitaraplyk — Türkmenistanyň röwşen geljegini, anyk we maksatnamalaýyn ösüşini üpjün edýän halkymyzyň goşa ganatydyr. Şeýle aýdyň maksatlaryň üstünlikli durmuşa geçirilmegi üçin şahsy goşandymyzy goşmak bolsa, biziň her birimiziň mukaddes borjumyzdyr. Watanyň durnukly ösüşini hem-de parahatçylygyny üpjün edýän Türkmen halkynyň Milli Lideri, Gahryman Arkadagymyza we Hormatly Prezidentimize berk jan saglyk, uzak ömür hem-de döwletli işlerinde üstünlikleri arzuw edýäris.