Türkmenistanyň Halk Maslahaty ýurdumyzda halk häkimiýetiniň, asylly demokratik ýörelgeleriň we milli jebisligiň iň ýokary wekilçilikli edarasydyr. Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Gurbanguly Berdimuhamedowyň gol çeken taryhy Kararyna laýyklykda, nobatdaky umumymilli forum 2026-njy ýylyň 23-nji sentýabrynda paýtagtymyz Aşgabat şäherindäki Maslahat köşgünde geçiriler. Bu ýylky mejlis döwletimiziň mukaddes Garaşsyzlygynyň şanly 35 ýyllyk toýunyň öňüsyrasyna gabat gelip, ýurduň strategik geljegini kesgitlemekde taryhy ähmiýete eýedir.

Türkmenistanyň Halk Maslahatynyň işi döwlet dolandyryşynyň iň kämil we adalatly nusgasy bolup durýar. Ol gadymy ata-babalarymyzyň möhüm döwlet meselelerini maslahatlaşyp çözmek baradaky köpasyrlyk tejribesine esaslanýar. Onuň işi Konstitusion kanuna esaslanyp, demokratiýa, aýanlyk, adalatlylyk we jemgyýetçilik pikirini nazara almak ýörelgelerine daýanýar. Forumda ýurduň durmuş-ykdysady ösüş ugurlary, uzak möhletleýin strategiýalar we halkyň rowaçlygyny ýokarlandyrjak kanunçylyk başlangyçlary ara alnyp maslahatlaşylýar.

Bu ýokary guramaçylykly forum «Watan diňe halky bilen Watandyr! Döwlet diňe halky bilen döwletdir!» diýen milli şygaryň iş ýüzündäki aýdyň dabaralanmasydyr. Nobatdaky mejlisde kabul ediljek taryhy çözgütler milli ykdysadyýetimizi diwersifikasiýa ýoly bilen ösdürmäge, hususyýetçiligi goldamaga we sanlylaşdyrmagy çaltlandyrmaga, raýatlaryň ýaşaýyş-durmuş derejesini has-da gowulandyrmak baradaky täze durmuş maksatnamalaryny tassyklamaga, ýaş nesilleri zähmete, ylma we sporta höweslendirmäge, şeýle hem ýaşuly nesliň pähim-paýhasyna daýanyp, milli agzybirligi pugtalandyrmaga gönükdiriler. 

Mälim bolşy ýaly, Türkmenistanyň Halk Maslahatynyň Prezidiumynyň mejlisi şu ýyl, ýagny 2026-njy ýylyň 15-nji iýulynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlylyk etmeginde geçirildi. Bu mejlis döwlet durmuşynyň iň wajyp meselelerini çözmekde we nobatdaky umumymilli foruma ykjam taýýarlyk görmekde taryhy tapgyra öwrüldi. Mejlisde hormatly Prezidentimiziň iýul aýynda Ministrler Kabinetiniň giňişleýin mejlisinde beren tabşyryklaryndan ugur alnyp, ýurdumyzyň Garaşsyzlygynyň şanly 35 ýyllyk toýuna görülýän taýýarlyk işleri ara alnyp maslahatlaşyldy. Garaşsyzlyk ýyllarynda ýurduň durmuş-ykdysady, medeni we ylmy ösüşine, halkyň agzybirligine uly goşant goşan raýatlary, zähmet öňdebaryjylaryny seljermek we olary döwlet sylaglaryna hödürlemek baradaky tekliplere seredildi. 

Umuman, Türkmenistanyň Halk Maslahatynyň nobatdaky mejlisine görülýän ýokary derejeli we ykjam taýýarlyk işleri we umumymilli forumyň  ýurdumyzyň Berkarar döwletiň täze eýýamynyň Galkynyşy döwründäki taryhy ösüşlerine täze we güýçli itergi berer. Nobatdaky umumymilli foruma görülýän giň gerimli we ykjam taýýarlyk işleri, kabul ediljek strategik maksatnamalar hem-de kanunçylyk başlangyçlary ýurdumyzyň ýakynda belleniljek mukaddes Garaşsyzlygynyň şanly 35 ýyllyk toýuna goşulýan uly goşantdyr. Halk Maslahatynyň Diwany tarapyndan guralýan halkara we ýerli çäreler, raýatlardan gelýän teklipleriň düýpli seljerilmegi bu forumyň täze taryhy eýýamda ýurdumyzyň durmuş-ykdysady we syýasy kuwwatyny has-da berkitjekdigini görkezýär. Bu ýokary guramaçylykly forum Milli Liderimiz Gahryman Arkadagymyzyň we hormatly Prezidentimiz Serdar Berdimuhamedowyň baştutanlygynda Türkmenistanyň mundan beýläk hem rowaçlanmagyna, halkymyzyň abadançylygynyň ýokarlanmagyna we nesilleriň dowamatlylygynyň üpjün edilmegine täze, kuwwatly itergi berer.

Garaşsyz, hemişelik Bitarap döwletimizi belent sepgitlere ýetirmekde, il-günümiziň parahat we bagtyýar durmuşda ýaşamagy ugrunda beýik tutumlary üçin Milli Liderimiz Gahryman Arkadagymyza hem-de hormatly Prezidentimize sagbolsunlarymyzy aýdýarys. Berkarar döwletimizi täze üstünliklere sary ynamly alyp barýan Gahryman Arkadagymyza we Arkadagly Serdarymyza bek jan saglyk, uzak ömür, döwletli we illi-ýurtly işlerinde hemişe üstünlikler ýar bolsun!