Türkmenistanyň Senagatçylar we telekeçiler partiýasynyň hem-de Türkmenistanyň Senagatçylar we telekeçiler birleşmesiniň bilelikde guramagynda partiýanyň mejlisler jaýynda «Hormatly Prezidentimiziň durmuşa geçirýän durmuş-ykdysady özgertmeleriniň netijesinde ýurdumyzda azyk bolçulygyny berkitmekde hususy pudagyň goşandy» atly maslahat duşuşygy geçirildi.

Çärede hormatly Prezidentimiziň baştutanlygynda ýurdumyzda amala aşyrylýan giň möçberli durmuş-ykdysady özgertmeleriň, hususyýetçiligi ösdürmäge berilýän döwlet goldawlarynyň netijesinde milli ykdysadyýetimiziň ähli pudaklarynda, şol sanda oba hojalygynda we azyk senagatynda uly üstünlikleriň gazanylýandygy nygtaldy.

Duşuşyga gatnaşyjylar ýurdumyzyň telekeçileriniň we işewürleriniň bazarlarymyzy ýokary hilli, ekologik taýdan arassa we elýeterli azyk harytlary bilen doldurmakda, oba hojalyk önümçiligini diwersifikasiýa ýoly bilen ösdürmekde hem-de täze iş orunlaryny döretmekde uly goşant goşýandygyny bellediler. Maslahatda bellenilişi ýaly, milli telekeçilik pudagy diňe bir içerki bazary üpjün etmek bilen çäklenmän, eýsem, bäsdeşlige ukyply oba hojalyk we azyk önümlerini daşary ýurtlara eksport etmek möçberlerini hem yzygiderli artdyrýar.

Hususy pudagyň ösüşine giň ýol açýan, ýurdumyzda bolçulygyň we abadan durmuşyň üpjün edilmegi ugrunda taýsyz tagallalary edýän Hormatly Prezidentimize hem-de Gahryman Arkadagymyza tüýs ýürekden sagbolsunlar aýdýarys. Goý olaryň janlary sag, ömürleri uzak, döwletli işleri elmydama rowaç alsyn!