Berkarar döwletiň täze eýýamynyň Galkynyşy döwründe ýurdumyzda ýaş nesliň döwrebap bilim almagy, ylym we önümçilik bilen berk baglanyşykda hünär öwrenmegi ugrunda uly aladalar edilýär. Şunuň bilen baglylykda, ýakynda Türkmenistanyň Senagatçylar we telekeçiler partiýasynyň Aşgabat şäher komitetiniň hem-de Halkara senagatçylar we telekeçiler uniwersitetiniň bilelikde gurnamagynda «Abadan haly» açyk görnüşli paýdarlar jemgyýetinde ýaşlary telekeçilik işine çekmek maksady bilen gyzykly hem-de mazmunly tejribe okuw sapagy guraldy.

Oňa uniwersitetiň mugallymlary we işjeň talyplary gatnaşdylar. Çäräniň esasy maksady ýaşlaryň telekeçilik ukybyny ösdürmek, alyp barýan nazary bilimlerini önümçilik bilen aýrylmaz baglanyşdyrmak hem-de ýurdumyzda telekeçilik hereketini giňden wagyz etmekden ybarat boldy.

Duşuşygyň dowamynda talyplar «Abadan haly» kärhanasynyň iş prosesi, önümçilige ornaşdyrylan häzirki zaman tehnologiýalary we harytlaryň taýýarlanylyş tertibi bilen ýakyndan tanyşdylar. Hünärmenler tarapyndan ýaşlara telekeçilige başlamagyň ýollary, işi guramagyň we dolandyrmagyň usullary barada giňişleýin gürrüň berildi. Bu tejribe okuw sapaklary talyplaryň hünär derejesini ýokarlandyrmakda, olaryň geljekde ýurdumyzyň ykdysadyýetine işjeň gatnaşjak başarnykly hünärmenler we başarjaň telekeçiler bolup ýetişmegine uly itergi berýär. Ösüşli ýyllarda ýaşlaryň döredijilikli zähmete çekilmegi ata Watanymyzyň rowaçlygyny üpjün edýän wajyp ädimleriň biridir.

Ýaş nesiller hakynda edilýän aladalary, olaryň döwrebap bilim alyp, hünär öwrenmegi hem-de telekeçilik we zähmet ýoluna ynamly gadam basmagy üçin giň mümkinçilikleri döredip berýän hormatly Prezidentimize hem-de Gahryman Arkadagymyza tüýs ýürekden çäksiz sagbolsun aýdýarys.