Golaýda Halkara Bitaraplyk güni mynasybetli Türkmenistanyň Senagatçylar we telekeçiler partiýasynyň Ahal welaýat komitetiniň gurnamagynda «Şanly bedew» hojalyk jemgyýetinde «Türkmenistanyň baky Bitaraplygy - parahatçylygyň, asudalygyň gözbaşydyr» atly maslahat duşuşygy geçirildi. 

Hormatly Prezidentimiziň sahawata ýugrulan adalatly we ynsanperwer syýasaty netijesinde  Bitaraplyk – türkmen halky üçin buýsançly, bagtlylygyň alamatydyr. Hemişelik Bitaraplygymyz türkmen halky üçin  dabarasy soňlanmajak baýramymyzdyr. Hemişelik Bitaraplyk hakynda gürrüň açylanda, türkmen döwletiniň geçmişiniň, şu gününiň we geljeginiň arasyndaky özboluşly köpri göz öňüňde janlanýar. Bitaraplyk syýasatynyň bütin dünýäde uly goldawa eýediginiň nobatdaky subutnamasydyr.

Hormatly Prezidentimiziň oýlanyşykly döwlet syýasaty netijesinde Türkmenistan döwletimiz ygtybarly we oňyn gatnaşyklaryň üstünlikli ýola goýulýan ýurdy hökmünde dünýäde giňden tanalýar. Bu ugurda Birleşen Milletler Guramasy tarapyndan iki gezek ykrar edilen Türkmenistanyň hemişelik Bitaraplygynyň özboluşlylygy onuň halkara ynsanperwer hyzmatdaşlygyň ilerledilmegindäki aýratyn orny bilen şertlendirilip, sebitde we dünýäde parahatçylygyň, howpsuzlygyň hem-de durnukly ösüşiň ýola goýulmagy ýaly belent maksatlardan gözbaş alýar. Halkara hukuk tejribesinde täze bir ugur bolmak bilen, Türkmenistanyň hemişelik Bitaraplygy Ýer ýüzünde hyzmatdaşlygyň we deňhukuklylygyň saklanylmagynyň täze konsepsiýasyny kemala getirýär, ýurdumyzyň halkara giňişlikde adamzadyň gymmatlyklarynyň we umumy gyzyklanmalarynyň goragyndaky öňdebaryjylygyny has-da pugtalandyrýar. Şunuň bilen baglylykda, parahatçylyk söýüjilik, deňhukuklylyk, beýleki döwletleriň içerki işlerine goşulmazlyk, harby bileleşiklere gatnaşmazlyk, özara bähbitli hyzmatdaşlygy durmuşa geçirmek ýaly ýörelgeler döwletimiziň oňyn Bitaraplyk syýasatynyň aýrylmaz düzüjileri bolup durýar.

Dünýä ýüzünde parahatçylygy, durnuklylygy we asudalygy pugtalandyrmakda ägirt uly tagallalary amal edýän Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, döwletli işleri hemişe rowaçlyklar beslensin!