Türkmenistanyň Senagatçylar we telekeçiler partiýasynyň Ahal welaýat komitetiniň gurnamagynda “Nur bina gurluşyk” hususy kärhanasynda wagyz-nesihat duşuşygy geçirildi. Döwletiň, jemgyýetiň her bir babatdaky ösüşi bilimiň, ylmyň näderejede ösýändigine bagly bolup durýar. Berkarar döwletiň täze eýýamynyň Galkynyşy döwründe durmuşa geçirilýän özgertmeler ýurdumyzyň geljegi bolan ýaş nesil hakyndaky aladany hem öz içine alýar. Şonuň üçinem Hormatly Prezidentimiziň alyp barýan döwlet syýasatynda ylymly-bilimli, giň dünýägaraýyşly, dünýäniň iň soňky gazanan tehnologiýalaryndan baş çykarýan ýaş nesli kemala getirmek aýratyn orun alýar. Duşuşykda Hormatly Prezidentimiziň başda durmagynda ýurdumyzda türkmen telekeçileriniň has-da ösdürilmegi, hususy telekeçilere döwlet tarapyndan giň goldaw-hemaýat berilmegi we ýaş telekeçileriň ýurduň ykdysadyýetine goşýan goşantlary barada aýdyldy. Şeýle hem duşuşygyň dowamynda Türkmenistanda ýaşlary telekeçilik işine çekmek, ýaş nesillerimiziň alan hünär bilimini önümçilikde, döwlet gullugynda, ylym we döredijilik ugurlarynda has-da oňaýly peýdalanmaklary üçin öňde goýlan maksatlar bellenilip geçildi. Duşuşygyň ahyrynda oňa gatnaşanlar ýaşlara telekeçilik işini alyp barmakda giň mümkinçilikler döredip berýän Hormatly Prezidentimize öz sagbolsunlaryny we alkyş sözlerini aýtdylar. Duşuşyga gatnaşyjylar türkmen halkyny röwşen geljege tarap alyp barýan Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, döwletli tutumlarynyň has-da rowaç almagyny arzuw etdiler.