2022-nji ýylyň 23-nji awgustynda Türkmenistanyň Senagatçylar we telekeçiler partiýasynyň Ahal welaýat komitetiniň gurnamagynda “Türkmen telekeçileri bu gün aýdyň maksatly ýollar bilen öňe barýar” atly maslahat geçirildi. 

Bu maslahatda Hormatly Prezidentimiziň ýolbaşçylygynda eziz Diýarymyzda milli ykdysadyýetimizi diwersifikasiýa ýoly bilen ösdürmek, bazar gatnaşyklarynyň ýörelgelerini giňden ornaşdyrmak babatda giň gerimli işler alnyp barylýar. Türkmen telekeçileri döwlet tarapyndan berilýän uly goldawlardan we döredilýän amatly şertlerden peýdalanyp, iri taslamalary, senagat kärhanalaryny, döwrebap söwda toplumlaryny, medeni-durmuş maksatly desgalary durýarlar, täze obalary, şäherleri döretmäge işjeň gatnaşýarlar. Döwlet maksatnamalarynyň üstünlikli amal edilmeginiň çäklerinde alnyp barylýan bu giň gerimli işler ýurdumyzyň durmuş-ykdysady taýdan ösdürilmeginde, ilatymyzyň ýaşaýyş-durmuş şertleriniň mundan beýläk hem gowulandyrylmagynda möhüm ähmiýetlidir.

Ahal welaýatynyň täze, döwrebap edara ediş merkezlerindäki binalar we desgalar türkmen telekeçileri tarapyndan amal edilýän iri gurluşyklaryň biri. Hormatly Prezidentimiziň Karary bilen täze şäheriň binalarynyň we desgalarynyň gurluşygyna maýa goýumlaryň bölünip berilmegi, bu düýpli gurluşykda işleriň ýokary depginlerde alnyp barylmagyna şert döretdi. Mälim bolşy ýaly, täze dolandyryş merkeziniň taslamasy ýurdumyzyň günorta sebitini ösdürmegiň çäklerinde iň soňky dünýä tejribeleri we innowasion tehnologiýalar esasynda taýýarlanyldy. Gojaman Köpetdagyň eteginde gurulýan welaýatymyzyň täze, döwrebap edara ediş merkezi türkmen şähergurluşyk pudagynda gazanylan oňyn tejribeleri özünde jemläp, ýurdumyzyň ilatynyň ýaşaýyş-durmuş şertleriniň ýokary derejesini üpjün edýän şäherleriň birine öwrüljekdigini uly buýsanç bilen bellediler. Şeýle mümkinçilikleri döredip berýän Gahryman Arkadagymyza, Hormatly Prezidentimize uzak ömür, berk jan saglyk, il-ýurt bähbitli, döwlet ähmiýetli beýik işlerinde egsilmez rowaçlyklary arzuw etdiler.