2022-nji ýylyň 14-nji iýulynda Türkmenistanyň Senagatçylar we telekeçiler partiýasynyň Daşoguz welaýat komitetiniň we Magtymguly adyndaky Ýaşlar Guramasynyň Daşoguz welaýat Geňeşiniň bilelikde guramagynda Daşoguz welaýatynyň Taryhy we Ülkäni öwreniş muzeýiniň mejlisler jaýynda welaýatymyzyň ýaşlarynyň we ýaş telekeçileriniň gatnaşmagynda ýaşlary watançylyk, zähmetsöýerlik, belent ahlaklyk ruhunda terbiýelemek maksady bilen “Arkadag ýaşlara görelde mekdep” atly wagyz-nesihat duşuşygy geçirildi. Hormatly Prezidentimiziň Gahryman Arkadagymyzyň ýurdumyzyň ýaşlary dogrusynda edýän aladalary, berýän öwün-ündewleri we bu ugurda alyp barýan işleri duşuşygyň esasy mowzugyna öwrüldi. Duşuşygyň dowamynda Hormatly Prezidentimiziň tabşyrygy bilen Gahryman Arkadagymyzyň ýurdumyzyň welaýatlaryna amala aşyran iş saparlarynyň ähmiýeti we bu duşuşyklarda aýdylan teklipler hem-de kabul edilen kararlar dogrusynda giňişleýin gürrüň edildi. Şeýle hem ýaşlar syýasatynda alnyp barylýan işler, ýaşlary telekeçilige çekmek boýunça döredilýän ýeňillikler barada çykyş edenler belläp geçdiler. Duşuşykda ýurdumyzyň telekeçilerine telekeçilik işi bilen meşgullanmaklary üçin döredilýän giň mümkinçilikler we şertler dogrusynda aýratyn durup geçdiler. Duşuşykda çykyş edenler Hormatly Prezidentimize Gahryman Arkadagymyza edýän aladalary, döredip berýän giň mümkinçilikleri üçin köp sag bolsun aýtdylar.