Şu gün Türkmenistanyň Senagatçylar we telekeçiler partiýasynyň Daşoguz welaýat komiteti hem-de Türkmenistanyň Zenanlar birleşiginiň Daşoguz welaýatynyň Köneürgenç etrap bölümi bilen bilelikde welaýatyň Köneürgenç etrabynyň Bitaraplyk şäherçesinde ýerleşýän «Köneürgenç» toý mekanynda Halkara zenanlar güni mynasybetli «Zenanlar bagtyýarlygyň gözbaşy» atly aýdym-sazly baýramçylyk çäresi geçirildi.

        Aýdym-sazly baýramçylyk çärede işjeň agzalaryň ýürek buýsançlary we gutlaglary diňlenildi hem-de berkarar ýurdumyzda zenanlaryň abadan durmuşyny üpjün etmek ugrunda alnyp barylýan işler dogrusynda giňişleýin gürrüň etdiler. Etrabyň sungat işgärleriniň baýramçylyk çykyşlary dabaranyň göwün galkyndyryjy pursatlaryny artdyrdy. Belentden ýaňlanan ajaýyp aýdym-sazlarda, ýerine ýetirilen owadan tanslarda döwranly döwrümiziň, mährem eneleriň, gyz-gelinleriň, hormatly Prezidentimiziň zenanlar hakdaky tükeniksiz aladalarynyň waspy ýetirildi.

  Dabaranyň  ahyrynda Türkmenistanyň Senagatçylar we telekeçiler partiýasynyň Daşoguz welaýat komiteti tarapyndan Halkara zenanlar güni mynasybetli sowgatlar gowşuryldy.