Türkmen halkynyň Milli Lideri Gahryman Arkadagymyzyň başlangyjy bilen döredilen hem-de hormatly Prezidentimiziň goldawlary esasynda galkynýan Türkmenistanyň Senagatçylar we telekeçiler birleşmesi 18 ýyl bäri ýurdumyzyň işewürlerini birleşdirýän iri düzüm hökmünde Watanymyzyň ösüşlerine, halkymyzyň eşretli durmuşyna gönükdirilen özgertmelere uly goşant goşup gelýär. Hususyýetçileriň yhlasly zähmetiniň netijesinde telekeçilik taryh üçin gysga döwürde ýurdumyzda önüm bolçulygyny üpjün edýän ulgama öwrüldi. Bu gün «Türkmenistanda öndürildi» diýen haryt nyşanly önümler amatly bahalary hem-de ýokary hili bilen içerki bazarda we daşary ýurtlarda uly islegden peýdalanýar.

Häzirki döwürde azyk howpsuzlygy islendik döwletiň durnuklylygynyň we özbaşdaklygynyň esasy sütünleriniň biridir. Türkmenistan üçin bu mesele strategik ähmiýete eýe bolup, ony çözmekde esasy güýç hökmünde hususy pudak öňe saýlanýar. Türkmenistanyň Senagatçylar we telekeçiler birleşmesi soňky ýyllarda içki bazary ýokary hilli önümler bilen doldurmaga we ýurdumyzyň eksport kuwwatyny artdyrmaga goşant goşýan ägirt uly güýje öwrüldi.

Türkmenistanyň Senagatçylar we telekeçiler birleşmesiniň agzalarynyň gazanan iň uly üstünlikleriniň biri döwrebap ýyladyşhana hojalyklarynyň ösdürilmegidir. Sanly tehnologiýalary we damjalaýyn suwaryş ulgamlaryny ornaşdyrmak arkaly, telekeçilerimiz bereketli topragymyzdan bol hasyl almagy başarýarlar. Bu günki gün türkmen pomidorlary halkara derejesinde abraýly haryt nyşanyna öwrülip, GDA we Ýewropa bazarlarynda uly islegden peýdalanýar. Bu bolsa hususy başlangyçlaryň we innowasiýalaryň birleşmeginiň nähili uly netijeler berýändiginiň subutnamasydyr.

Hususyýetçiler tarapyndan maldarçylyk we guşçulyk pudaklarynda hem düýpli öňegidişlikler gazanylýar. Hususy kärhanalar mal iýmini öndürmekden başlap, taýýar et we süýt önümlerini çykarmaga çenli önümçiligiň doly tapgyryny ýola goýdular. Dükanlarymyzda we söwda merkezlerimizde ýerli önümleriň agdyklyk etmegi, olaryň daşary ýurt harytlaryndan hil taýdan kem galmazlygy halkymyzyň öz önümlerimize bolan ynamyny artdyrýar. Ýumurtga, guş eti we süýt önümleri boýunça importyň ornuny tutmak syýasaty üstünlikli amala aşyrylýar.

Şeýle hem hususy pudagyň gaýtadan işleýän senagatdaky sepgitlerini aýratyn bellemek gerek. Türkmenistanyň Senagatçylar we telekeçiler birleşmesiniň agzalary konditer önümlerini, miwe şirelerini, gaplanan önümleri we çaga iýmitlerini öndürmekde uly sepgitlere ýetdiler. Häzirki zaman Ýewropa enjamlarynyň ulanylmagy, önümleriň ISO we HACCP ýaly halkara standartlaryna laýyk gelmegini üpjün edýär. Bu diňe bir azyk bolçulygyny üpjün etmek bilen çäklenmän, eýsem, täze iş orunlarynyň müňlerçesiniň döredilmegine hem ýardam edýär.

Türkmenistanyň Senagatçylar we telekeçiler birleşmesiniň agzalarynyň gazanýan üstünlikleri döwlet bilen hususy pudagyň arasyndaky netijeli hyzmatdaşlygyň aýdyň miwesidir. Telekeçilere ýeňillikli karzlaryň berilmegi we ýer bölekleriniň uzak möhletleýin kärendesine berilmegi, olara iň döwrebap taslamalary amala aşyrmaga şertleri döredýär. Şu gün Türkmenistanyň azyk howpsuzlygy milli telekeçilerimiziň tutanýerli zähmeti we döwrebap innowasiýalary bilen rowaçlyga beslenýär.

Paýtagtymyzda ýakyn günlerde Türkmenistanyň Senagatçylar we telekeçiler birleşmesiniň döredilmeginiň 18 ýyllygy mynasybetli geçirilmegi meýilleşdirilýän giň gerimli sergi türkmen işewürleriniň gazanan üstünliklerini, ýeten sepgitlerini aýdyň görkezer. Milli Liderimiziň hem-de Arkadagly Gahryman Serdarymyzyň tagallalary esasynda halkymyzyň eşretli durmuşy, ýurdumyzyň gülläp ösmegi ugrunda amala aşyrylýan beýik işlere mynasyp goşant goşmak uly hormatdyr.