Türkmenistanyň Senagatçylar we telekeçiler partiýasynyň Mary welaýat komitetiniň guramagynda «Datly şerbet» hususy kärhanasynda Türkmenistanyň Halk Maslahatynyň nobatdaky mejlisiniň ähmiýetine bagyşlanan «Halk Maslahaty – durnukly ösüşiň bähbidine» atly maslahat duşuşygy geçirildi.

Duşuşykda ýurdumyzyň mukaddes Garaşsyzlygynyň 34 ýyllygynyň öňüsyrasynda geçiriljek Türkmenistanyň Halk Maslahatynyň nobatdaky mejlisiniň möhüm ähmiýetli waka öwrüljekdigi barada täsirli gürrüň edildi. Çykyş edenler ýurdumyzy ösüşiň täze derejesine çykarmakda, halkymyzyň eşretli durmuşyny üpjün etmekde we jebisligini pugtalandyrmakda umumymilli forumyň ähmiýeti dogrusynda giňişleýin durup geçdiler.

Duşuşykda ahyrynda oňa gatnaşanlar Watanymyzyň halkara derejesindäki abraýynyň belende galmagy, halkymyzyň eşretli durmuşynyň dowamat-dowam bolmagy ugrunda nusgalyk işleri amala aşyrýan Gahryman Arkadagymyza, Arkadagly Gahryman Serdarymyza päk ýürekden çykýan alkyş sözlerini beýan etdiler.