2023-nji ýylyň 26-njy iýunynda Türkmenistanyň Senagatçylar we telekeçiler partiýasynyň Daşoguz welaýat komitetiniň we Türkmenistanyň Döwlet Gümrük gullugynyň Daşoguz welaýat Gümrükhanasynyň bilelikde guramagynda Daşoguz şäher häkimliginiň mejlisler jaýynda “Sagdyn durmuş – bagtyýar geljegiň kepili” atly maslahaty geçirildi. Berkarar döwletiň täze eýýamynyň Galkynyşy döwründe Hormatly Prezidentimiziň parasatly baştutanlygynda ýurdumyzda saglygy goraýyş ulgamyny ösdürmek, halkymyzyň zyýanly endiklerden daşda durmagyny gazanmak boýunça birnäçe maksatnamalaýyn işler alnyp barylýar. Türkmenistany temmäkiden azat ýurda öwürmek boýunça 2022-2025-nji ýyllar üçin Milli Maksatnama laýyklykda ýurdumyzda alnyp barylýan giň gerimli işler barada maslahatyň dowamynda çykyş edenler belläp geçdiler. Şeýle hem, ýurdumyzda ilatymyzyň saglygyny berkitmek, berk bedenli sagdyn ýaşlary kemala getirmek boýunça döredilýän şertler, mümkinçilikler dogrusynda çykyş edenler buýsanç bilen aýdyp geçdiler. Maslahat ýurdumyzy sagdynlygyň we bagtyýarlygyň ýurduna öwürmek boýunça alyp barýan beýik işleri üçin Türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Serdarymyza hoşallyk sözleri bilen jemlendi.