Ýurdumyzda ähli pudaklar bilen bir hatarda senagat pudagyny, hususy telekeçiligi ösdürmek Hormatly Prezidentimiziň, Arkadagly Serdarymyzyň ýolbaşçylygynda döwletimizde üstünlikli durmuşa geçirilýän ykdysady syýasatynyň ileri tutulýan ugurlarynyň biridir. Soňky ýyllaryň dowamynda gurlup, ulanylmaga berlen dürli maksatly desgalar milli Liderimiziň, Arkadagly Serdarymyzyň döredijilikli syýasatynyň oňyn netijesidir, ösüşiň täze belentliklerine tarap okgunly öňe barýan Watanymyzyň barha artýan kuwwatynyň aýdyň subutnamasydyr. Köp pudakly milli ykdysadyýetimiziň innowasiýalar esasynda mundan beýläk-de ösdürilmegine, örän baý tebigy serişdeleriň doly derejede peýdalanylmagyna, sebitleriň toplumlaýyn özgerdilmegine gönükdirilen ileri tutulýan maksatnamalara laýyklykda, ýurdumyzy okgunly ösdürmek üçin şertleriň döredilmeginde maýa goýum-gurluşyk toplumyna ähmiýetli orun degişlidir. Döwlet Baştutanymyz tarapyndan yzygiderli durmuşa geçirilýän bu strategiýanyň netijesinde, daşyndan getirilýän harytlaryň ornuny tutýan hem-de eksport ugurly önümleriň dürli görnüşlerini öndürýän senagat kärhanalary gurulýar. “Türkmenistanyň Prezidentiniň ýurdumyzy 2019-2025-nji ýyllarda durmuş-ykdysady taýdan ösdürmegiň Maksatnamasyna” laýyklykda, şäher we oba ýerlerini ösdürmek, ýurdy senagatlaşdyrmak, ulag-logistika düzümlerini döretmek boýunça ägirt uly işler durmuşa geçirilýär. Şu nukdaýnazardan “Türkmenistanda öndürilýän önümleriň daşary ýurtlara iberilýän möçberini artdyrmak boýunça Döwlet maksatnamasyny” hem-de Türkmenistanyň Prezidentiniň “Saglyk” Döwlet maksatnamasyny üstünlikli durmuşa geçirmek, ekologik taýdan arassa ýerli çig mallardan dünýä bazarynda bäsdeşlige ukyply derman serişdeleriniň önümçiligini ýola goýmak maksady bilen, Türkmenistanyň Prezidentiniň 2021-nji ýylda gol çeken il-ýurt bähbitli karary barada durup geçsek ýerlikli bolar. Resminama laýyklykda, Saglygy goraýyş we derman senagaty ministrligine Lebap welaýatynyň Türkmenabat şäherinde Saglygy goraýyş we derman senagaty ministrliginiň “Türkmendermansenagat” birleşiginiň S.A.Nyýazow adyndaky “Buýan” obasenagat toplumynyň buýan köküni gaýtadan işläp, ýylda 390 tonna arassalanmadyk glisirrizin turşusyny öndürmek üçin niýetlenen kärhanasyny ýanaşyk ýerlerini abadanlaşdyryp gurmak barada “Mizemez gadam” hususy kärhanasy bilen şertnamany, kärhana üçin elektrik, aragatnaşyk, gaz, suw üpjünçiliginiň hem-de lagymyň meýdançadan daşarky eltiji inžener ulgamlarynyň we desgalarynyň taslamalaryny düzmek baradaky işlerini ýerine ýetirmek şertinde baglaşmaga ygtyýar berildi. Ine bu gün bolsa, Döwlet we halk bähbitli işleriň netijesinde Ýurdumyzyň gündogarynda, Jeýhun kenaryny jähekläp duran Lebap welaýatynyň Türkmenabat şäherinde, Hormatly Prezidentimiziň tagallasy esasynda düýbi tutulyp, gurluşygyna badalga berlen, Merkezi Aziýa sebiti boýunça ilkinjileriň hatarynda, Lebap welaýatynda ösýän Buýan ösümliginiň kökünden alynýan glisirrizin turşusyny öndürýän kärhanasynyň bedew batly gurluşygy barada buýsançly bellemeklige haklydyrys. “Mizemez gadam” hususy kärhanasy tarapyndan gurluşygyna başlanylan glisirrizin turşusyny öndürýän kärhanasynyň esasy maksady daşary ýurtlardan getirilýän harytlaryň ornuny tutýan önümleriň, ýagny medisina ulgamynda, konditer önümçiliginde giňden ulanylýan glisirrizin turşusynyň ýurdumyzda öndürilip senagatda giňden peýdalanmaklyk bolup durýar. Bu bolsa Garaşsyz, baky Bitarap döwletimiziň senagat taýdan ösmegine, täze iş ýerleriniň açylmagyna özüniň uly goşandyny goşar. Uly depginli alnyp barylýan kärhananyň gurluşyk işleri 2024-nji ýylyň ýanwar aýynda tamamlanyp, doly ulanmaga berler. Hormatly Arkadagymyzyň, Arkadagly Serdarymyzyň halkymyzyň asuda, parahat durmuşda ýaşamagy, zähmet çekmegi ugrunda alyp barýan dünýä nusgalyk işleri mundan beýläkde rowaç alsyn! Hormatly Arkadagymyzyň, Arkadagly Serdarymyzyň janlary sag, ömürleri uzak bolsun!