Diýarymyzyň milli ykdysadyýetinde döwlete degişli bolmadyk ulgamda ýokary tehnologiýaly innowasion önümçiligi ösdürmäge, kiçi we orta telekeçiligiň giň mümkinçiliklerini durmuşa geçirmäge aýratyn üns berilýär. Ýurdumyzda bolşy ýaly, bu ugurda Balkan welaýatynda amala aşyrylýan işler hem ajaýyp netijelerini berýär. Türkmenistanyň Senagatçylar we telekeçiler birleşmesiniň agzasy bolan «Rysgally nesip» hojalyk jemgyýetiniň Balkanabat şäheriniň Jebel şäherçesinde ýerleşýän önümhanasy-da şolaryň biridir.

Arkadagly Gahryman Serdarymyzyň hususy ulgamy ýokary depginler bilen ösdürmek boýunça döredip berýän giň mümkinçiliklerinden ruhlanýan hojalyk jemgyýetiniň hünärmenleri geljekde hem döwrebap işleri alyp barmagy asylly maksat edinýärler. Bu ýerde ösen tehnologik enjamlaryň ornaşdyrylmagy dürli görnüşli önümleri taýýarlamaga giň mümkinçilik berýär. Ýakynda hojalyk jemgyýetiniň Jebel şäherçesindäki önümhanasynda «Çyrag» haryt nyşanly LED lampalar öndürilip başlandy. Ýaşlaryň birbada 40-a golaýyny iş bilen üpjün eden önümhanada taýýarlanylýan ýokary hilli lampalar sarp edijileriň uly isleginden peýdalanýar. Önümhanada ýagtylyk güýji 6 — 50 wat aralygynda bolan LED lampalaryň 10-dan gowrak görnüşi öndürilýär.

Ýurdumyzyň elektroenergetika pudagynyň ösüşlerine saldamly goşant goşmagy maksat edinýän bu hojalyk jemgyýetiniň Türkiýäniň «Türkay» kompaniýasy bilen baglaşan şertnamasy esasynda işe girizen önümhanasynda häzirki günlerde işler barha gyzyşýar. Bu ýerde işleýän hünärmenleriň ençemesiniň daşary ýurtlarda ýörite taýýarlyk okuwlaryny geçmekleri öndürilýän çyralaryň hilini ýokarlandyrmak bilen birlikde, önümleriň sanynyň artmagyna-da täsirini ýetirýär. Ýyllyk kuwwaty 400 müň lampany öndürmäge niýetlenen önümhanada sarp edijileriň isleglerini öwrenip, taýýarlanylýan önümleriň görnüşlerini ýakyn wagtlarda has-da köpeltmek meýilleşdirilýär. Olary geljekde daşarky sarp edijilere-de ugratmak göz öňünde tutulýar.

«Rysgally nesip» hojalyk jemgyýetiniň Jebel şäherçesindäki önümhanasynyň hünärmenleri hemişelik Bitaraplygymyzyň ýetip gelýän şanly 29 ýyllyk toýuny ýokary önümçilik görkezijileri bilen garşylamak üçin şu günler has-da yhlasly zähmet çekýärler. Olar hususy ulgamda halal işläp, döwletimiziň ykdysady kuwwatynyň artmagyna mynasyp goşant goşmaga döredýän giň mümkinçilikleri üçin Arkadagly Gahryman Serdarymyza alkyş aýdýarlar.