Türkmenistanyň Senagatçylar we telekeçiler partiýasynyň Aşgabat şäher komitetiniň gurnamagynda Halkara senagatçylar we telekeçiler uniwersitetiniň talyplarynyň gatnaşmagynda Telekeçi A.Pogasýan «Erteki» süýt önümleri we doňdurma öndürýän kärhanasynda Ýaşlary telekeçilik işine çekmek maksady bilen «Ýaşlar röwşen geljegimizdir» atly tejribe okuw sapagy geçirildi. Ýaşlaryň innowasion we telekeçilik başlangyçlaryny goldamak, olaryň alýan nazary bilimlerini amaly önümçilik bilen utgaşdyrmak maksady bilen amaly-tejribe meýilnamasynyň çäklerinde Halkara senagatçylar we telekeçiler uniwersitetiniň talyplary bilen göçme okuw sapagy guraldy. Göçme okuw sapagynyň dowamynda talyplar kärhananyň döwrebap önümçilik kuwwatyny, doňdurmalaryň we ýokary hilli süýt önümleriniň taýýarlanyş tapgyrlary bilen ýakyndan tanyşdylar. Kärhananyň tejribeli hünärmenleri talyp ýaşlara, süýt önümleriniň ilkinji barlagdan geçişini, halkara standartlaryna gabat geliş derejesini, doňdurmalaryň taýýarlanyşyny, garyndylaryň sazlaşygy hemde modern gaplaýyş işleýiş usulyny, önümleriň ekologik taýdan arassalygyny we terligini saklamagyň tilsimleri barada giňişleýin amaly maglumat berdiler. Sapak diňe bir önümçilik gezelenji bilen çäklenmän, eýsem ýaşlarda telekeçilik düşünjesini ösdürmäge hem uly binýat boldy. Okuw sapagynyň soňunda geçirilen interaktiw söhbetdeşlikde talyplar özlerini gyzyklandyrýan soraglara jogap aldylar. Ýaşlaryň bilim almagy, amaly hünär öwrenmegi we telekeçilik başlangyçlaryny amala aşyrmagy üçin giň mümkinçilikleri döredip berýän Gahryman Arkadagymyza, Arkadagly Gahryman Serdarymyza tükeniksiz sagbolsun aýtdylar.