Golaýda Türkmenistanyň Senagatçylar we telekeçiler partiýasynyň Mary welaýat komiteti, Türkmenistanyň Magtymguly adyndaky Ýaşlar guramasynyň Mary welaýat bölümi, Mary welaýat baş bilim müdirligi bilen bilelikde gurnamagynda Sakarçäge etrabynyň 45-nji orta mekdebiniň mejlisler zalynda Türkmenistanyň hemişelik Bitaraplygynyň şanly 30 ýyllygy mynasybetli wagyz-nesihat duşuşygy geçirildi.

Parahatçylyk we ynanyşmak adamzadyň abadan geljegini üpjün etmekde biri-biri bilen aýrylmaz baglanyşykly gymmatly düşünjeler bolup durýar. Şonuň üçinem hormatly Prezidentimiziň alyp barýan öňden görüjilikli daşary syýasaty dünýäde parahatçylygy, ynanyşmagy we hyzmatdaşlygy pugtalandyrmagy ýörelgesine eýerýändigi bilen adam zat jemgyýetçiliginde uly gyzyklanma döredýär. Birleşen Milletler Guramasynyň Baş  Assambleýasynyň kabul eden Kararnamalarynyň ikisi bilen ykrar edilen hemişelik Bitaraplygymyzyň taryhy ähmiýeti uludyr. Hemişelik Bitaraplygymyzyň 30 ýyllygynyň uly toýunyň üstümizdäki — Halkara parahatçylyk we ynanyşmak ýylynda toýlanyljakdygy şanly ýylymyzyň şanyna şan goşýar. Garaşsyz döwletimiziň Bitaraplyk hukuk derejesinden ugur alyp öňe sürýän halkara ähmiýetli başlangyçlaram dünýä jemgyýetçiliginiň ünsüni özüne çekýär we içgin öwrenilýär. Mysal üçin, geçen ýylda Türkmenistanyň başlangyjy esasynda BMG-niň Baş Assambleýasy tarapyndan «2025-nji ýyl — Halkara parahatçylyk we ynanyşmak ýyly» hem-de «Merkezi Aziýa — parahatçylyk, ynanyşmak we hyzmatdaşlyk zolagy» atly Kararnamalaryň Milletler Bileleşigine agza döwletleriň biragyzdan goldamagynda kabul edilmegi möhüm waka boldy. 

Munuň özi Arkadagly Gahryman Serdarymyzyň parasatly daşary syýasatynyň rowaç alyp, uly goldawa eýe bolýandygyna aýdyň subutnamadyr. Döwlet Baştutanymyzyň hoşniýetli, parahatçylyk söýüjilikli, daşary syýasat strategiýasy giň gerime eýe bolup, bütin dünýäde ählumumy howpsuzlygy berkidip, parahatçylykly gatnaşyklarda özara bähbitli köp taraplaýyn hyzmatdaşlygy ösdürmäge ýardam edýär. Bu ýörelge bolsa, durnukly ösüşi, abadançylygy, rahat durmuşy kepillendirýär.

Goý, biziň eziz Watanymyzy gülledip, bizi şeýle  bagtyýar döwürde ýaşamak bagtyna eýe eden Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, belent başlary anam bolup, tutýan tutumly işleri hemişe rowaçlyklara beslensin!