2024-nji ýylyň 11-nji martynda Türkmenistanyň Senagatçylar we telekeçiler partiýasynyň Mary welaýat komiteti tarapyndan gurnamagynda Senagatçylar we telekeçiler birleşmesiniň mejlisler jaýynda “Hususy pudakda ýetilen sepgitler täze üstünliklere ruhlandyrýar” atly maslahaty geçirildi.

Garaşsyzlyk ýyllarynda güýçli depginler bilen ösdürilen hususy pudak gysga wagtyň içinde dünýä derejesindäki belentliklere ýetdi. Şunda ilkinjileriň hatarynda hususy telekeçilige baş goşan işewürler bu günki günde ýaşlaryň ykdysady pudakdaky ýakyn maslahatçylaryna, görelde mekdebine öwrülýärler. Häzirki wagtda ýurdumyzyň ykdysady kuwwatynyň esasy bölegini eýeleýän hususy pudagyň öňdebaryjylary hökmünde kesgitlenýän halypa telekeçiler ýaşlara telekeçilik işiniň inçeliklerini ussatlyk bilen öwredýärler.

Maslahatda halypa telekeçileriň işewürlik ýolunda gazanan üstünlikleri, ýeten sepgitleri dogrusyndaky gürrüňlere giň orun berildi. Öz gezeginde çykyş eden halypa telekeçiler häzirki wagtda bu pudakda ýaşlara döredilip berilýän mümkinçilikleriň çäksizdigini, ýaş telekeçileriň hususy işini guramagy üçin döwlet tarapyndan ýakyndan ýardam berilýändigini aýratyn nygtap geçdiler. Şeýle hem çykyş edenler geoykdysady taýdan amatly gurşawda ýerleşýän ýurdumyzyň dünýä döwletleri bilen ykdysady-söwda gatnaşyklaryny netijeli alyp barmak üçin ähli şertleriň bardygyny, dünýä bazaryny kanagatlandyrýan ýokary hilli önümleri öndürmek arkaly ösüşli menzilleri nazarlap boljakdygy hakynda gyzykly gürrüňleri berdiler.

Maslahat ahyrynda Türkmenistanyň Senagatçylar we telekeçiler birleşmesiniň şeýle hem Türkmenistanyň Senagatçylar we telekeçiler partiýasynyň adyndan hormat hatlarydyr ýadygärlik sowgatlary gowşuryldy. Oňa gatnaşyjylar kiçi we orta telekeçiligi ösdürmeklige giň ýol açyp beren Gahryman Arkadagymyza hem-de onuň nusgalyk başlangyçlaryny mynasyp dowam etdirýän Arkadagly Gahryman Serdarymyza tüýs ýürekden çykýan alkyş sözlerini aýtdylar.