TÜRKMENISTANYŇ SENAGATÇYLAR WE TELEKEÇILER PARTIÝASY
Berkarar döwletimiziň bagtyýarlyk döwründe hormatly Prezidentimiziň parasatly baştutanlygynda ata Watanymyz öz saýlap alan syýasy ýoluna doly ygrarlydygyny, Bitaraplygyň ähli borçlaryny we talaplaryny gyşarnyksyz berjaý edýändigini dünýä ýüzünde subut etmegi başarýar. Gahryman Prezidentimiz diňe halkymyzyň däl, eýsem, dünýä jemgyýetçiliginiň hem bähbitlerini araýan, düýbünden täzeçillige ýugrulan çuň manyly taryhy we dünýä ähmiýetli teklipleri öňe sürýär. Ol teklipler dost-doganlyk gatnaşyklarynyň dünýä ýüzünde dabaralanmagyna, parahatçylygyň barha berkemegine ýardam berýär. 2015-nji ýylda BMG-niň Baş Assambleýasynyň 69-njy mejlisinde «Türkmenistanyň hemişelik Bitaraplygy» Rezolýusiýasynyň ikinji gezek kabul edilmegi, 2017-nji ýylda bu dünýä bileleşiginiň çözgüdi esasynda 12-nji dekabryň «Halkara Bitaraplyk güni» diýlip yglan edilmegi ata Watanymyzyň halkara abraýyny bütin dünýä ýaýdy. «Birleşen Milletler Guramasynyň Baş Assambleýasy tarapyndan Türkmenistanyň hemişelik bitaraplyk hukuk ýagdaýynyň ykrar edilmegi, ilkinji nobatda, mukaddes Garaşsyzlygymyzy pugtalandyrmaga, şonuň bilen birlikde, berkarar Watanymyzyň bitaraplyk, parahatçylyk söýüjilik, hoşniýetli goňşuçylyk, dost-doganlyk ýörelgelerini öňe sürýän kuwwatly we abadan döwlet hökmünde dünýäniň syýasy giňişligindäki abraýyny we ornuny has-da berkitmäge oňyn täsirini ýetirdi» diýip, Arkadag Prezidentimiz nygtaýar. Hemişelik Bitaraplygymyz milli Liderimiziň sebitiň, şol sanda dünýäniň ähli döwletleri bilen dost-doganlyk gatnaşyklaryny, özara bähbitli hyzmatdaşlygy ösdürmäge gönükdirilen ynsanperwer döwlet syýasatynda esasy ýol görkeziji bolup durýar. Gahryman Arkadagymyz ýurdumyzyň Garaşsyzlyk we Bitaraplyk syýasatyna eýerip, ösüş ýoly bilen öňe barýandygyny, bu ýoluň parahatçylyga, dostluga, birekbirege hormat goýmagyň hem-de özara peýdaly hyzmatdaşlygyň ýörelgelerini berjaý etmäge esaslanýandygyny buýsançly nygtaýar. Şunuň bilen baglylykda, welaýatymyzda hem hemişelik Bitaraplygymyzyň şanly 26 ýyllygyna bagyşlanyp guralan medeni çärelerdir dabaraly maslahatlar täsirliligi bilen tapawutlandy. Ol çäreler biziň hemişelik Bitarap Diýarymyza bolan söýgi-buýsanjymyzy has-da artdyrdy.
Baýmyrat Tuwakow, Türkmenistanyň Senagatçylar we telekeçiler partiýasynyň welaýat komitetiniň bölüm müdiri.
