Партия промышленников и предпринимателей Туркменистана

Последние статьи

Bereketli saçaklaryň bezegi

Türkmenistanyň Senagatçylar we telekeçiler birleşmesiniň hem-de Türkmenistanyň Senagatçylar we telekeçiler partiýasynyň agzasy Sapardurdy Nazlyýewiň Türkmenbaşy şäherindäki döwrebap tehnologiýaly ýyladyşhanasynda täze iş orunlarynyň 30-a golaýy döredilip, ol gök önümleriň dürli görnüşlerini ösdürip ýetişdirmäge niýetlenendir. Ýyladyşhana toplumynda geçen ýyl pomidor hasylynyň 400 tonna golaýy ýygnalyp, içerki hem-de daşarky bazarlara ugradyldy. Geçen ýylyň awgust aýynda bu ýerde Türkiýeden getirilen bulgar burçunyň tohumyndan ösdürilip ýetişdirilen şitiller ekildi. Biri-birinden reňkleri, tagamy, möçberi babatda tapawutlanýan bakja önümi mineral dökünler bilen iýmitlendirilip, bereketli hasyl kemala geldi.

Ýeri gelende aýtsak, ýyladyşhanada ekinler suwarylanda döreýän artykmaç suwlar ýörite akarjyklaryň kömegi bilen bir ýere toplanyp, telekeçiniň ýyladyşhananyň golaýyndaky 5 gektara ýaýylyp gidýän bag nahallaryny suwarmakda ulanylýar. Bagly meýdanda badam agajynyň 6 müň düýbi endigan boý alyp, olardan geljek ýyl ilkinji hasyla garaşylýar.

Ýyladyşhanada ýetişdirilen bulgar burçunyň hasylyny ýygnamak işleri geçen ýylyň dekabr aýyndan bäri dowam edýär. Ýygnalýan hasylyň möçberi her aýda 15 — 20 tonna ýetýär. Ýygym möwsüminiň ahyryna çenli toplumda 200 tonnadan gowrak bulgar burçuny ýygnap, sarp edijilere ýetirmek göz öňünde tutulýar.

Telekeçi Baýramdurdy Goçakowyň Magtymguly etrabynda ýerleşýän ýyladyşhanasynyň 0,5 gektarynda pomidor, 0,45 gektarynda bolsa bulgar burçy ösdürilip ýetişdirildi. Önümçilik kuwwaty ýylda 50 tonna pomidor hem-de şonça möçberde hem bulgar burçuny öndürmäge mümkinçilik berýän ýyladyşhanada häzire çenli 16 tonnadan gowrak pomidor, 5 tonna golaý bulgar burçy ýygnalyp, terligi bilen alyjylara ýetirildi.

Berkarar döwletiň täze eýýamynyň Galkynyşy döwrüniň giň mümkinçiliklerinden üstünlikli peýdalanýan balkanly hususyýetçiler tarapyndan ösdürilip ýetişdirilýän gök önümler bereketli saçaklarymyzyň bezegine öwrülýär. Arkadagly Serdarymyzyň ykdysadyýetde hususy pudagyň ornuny giňeltmekde edýän aladalaryndan ruhlanyp zähmet çekýän telekeçiler geljekde önümleriň görnüşlerini hem-de möçberini artdyrmagy maksat edinýärler.

Toýmämmet HAJYÝEW,Türkmenistanyň Senagatçylar we telekeçiler partiýasynyň Balkan welaýat komitetiniň başlygy.