Berkarar döwletiň täze eýýamynyň Galkynyşy döwründe Gahryman Arkadagymyzyň başlangyjy bilen hormatly Prezidentimiziň parasatly baştutanlygynda milli ykdysadyýetimiziň ähli pudaklaryny sanlylaşdyrmagyň binýadynda durnukly ösüşi gazanmak, jemgyýetimiziň we döwletimiziň esasy gymmatlygy bolan adamyň ýaşaýyş-durmuş derejesini dünýä standartyna laýyklykda halkara tejribesiniň iň täze gazananlaryny halkymyzyň milli aýratynlyklaryny nazara alyp ornaşdyrmak döwlet we milli maksatnamalarda ileri tutulýan wezipeler hökmünde kesgitlenilýär. Hemmämize mälim bolşy ýaly, 2018-nji ýylyň 30-njy noýabrynda Gahryman Arkadagymyzyň başlangyjy bilen kabul edilen, «Türkmenistanda 2019 – 2025-nji ýyllarda sanly ykdysadyýeti ösdürmegiň Konsepsiýasy» milli ykdysadyýetimiziň hil taýdan ösüşiniň täze başlangyjy boldy.

Gahryman Arkadagymyzyň belleýşi ýaly, sanlylaşdyrmak işleri, has oňat guramaga, utgaşdyrmaga hem-de netijeliligine we hiline gözegçilik etmäge ýardam edýän netijeli dolandyryş guralydyr. Arkadag şäherini halkara ölçeglere laýyklykda döwrebaplaşdyrmak boýunça giň gerimli işler alnyp barylýar. Bu şäherde häzirki zaman internet ulgamynyň serişdeleriniň hereket etmegi ýola goýuldy. Munuň özi döwrebap aragatnaşyk ulgamynyň kämil derejesiniň hemmeler üçin elýeterli bolmagyny şertlendirer. Döwrebap tehnologiýalaryň işe girizilmegi, edaralara we ýaşaýyş jaýlaryndaky her bir öýde ýokary tizlikli internet, IP telewideniýe hem-de telefon ulgamyndan peýdalanmaga mümkinçilik berer. Bulardan başgada, ýokary hilli öýjükli aragatnaşyk hyzmatyny hödürlemek maksady bilen, 3G we ýokary tizlikli internet ulgamyndan peýdalanmaga mümkinçilik berýän 4G enjamlar toplumynyň gurnalmagy bularyň üstüni ýetirýär. Gurulýan desgalarda «akylly» şäher we «akylly» öý hyzmatlaryndan uzak aralykdan peýdalanmaga mümkinçilik berýän häzirki zaman tehnologiýasy işe girizildi. Şeýle hem täze şäher Arkadag şäherinde halkara ülňülerine laýyk gelýän köp şahaly ýol-ulag düzüminiň bardygyny bellemek gerek. Giň şaýollar, köçeler we halkalaýyn çatryklar häzirki zaman yşyklandyryş, wideogözegçilik, dolandyryş ulgamlary bilen üpjün edilendir. Hususan­da, şäherde «Intelligent Transportation System» (ITS) ulag ulgamlaryny düzmekde we ulag akymlaryny düzgünleşdirmekde innowasion işläp taýýarlamalar ulanyldy. Intellektual tehnologiýalar bilen üpjün edilen «akylly» köçeleriň gurulmagy «ITS» ulgamynyň esasy wezipesidir.

Täze şäher öňdebaryjy sanly, maglumat-aragatnaşyk we «ýaşyl» tehnologiýalara esaslanýan «akylly» şäheriň aýdyň nusgasydyr. Bu ýerde ekologiýa ýaly möhüm ugra aýratyn üns berilýär. Arkadag şäheriniň «Ýewropada Howpsuzlyk we Hyzmatdaşlyk Guramasynyň sebitinde durnukly, «ýaşyl», howa üçin oňaýly we innowasion çözgütli şäherleri ösdürmek» taslamasyna goşulýandygy baradaky Güwanamanyň, şeýle hem Ykdysady Hyzmatdaşlyk Guramasynyň Arkadag şäheriniň ýaşaýşyň hil düzümini ýokarlandyrmaga gönükdirilen gurluşy hem-de aňrybaş tehnologiýalar, amallar we çeşmeleri arkaly häzirki zaman şäher ösüşi üçin Minnetdarlyk Şahadatnamasynyň berilmegi bu ulgamda öňde goýlan wezipeleriň üstünlikli çözülýändigine şaýatlyk edýär. Arkadag şäheri ähli görkezijiler babatda dünýä nusgalyk şäher bolmak bilen birlikde, ol ýurdumyzyň ösen ykdysady kuwwatynyň hem aýdyň dabaralanmasydyr. Täze şäherde sanly ulgamyň soňky gazananlarynyň, döwrebap innowasion çözgütleriň, «akylly» tehnologiýalaryň işjeň ulanylmagy halkymyzyň buýsanjyny has-da artdyrýar. Munuň özi halkymyzyň abadançylygynyň, bagtyýar durmuşynyň bähbidine amala aşyrylýan işleriň barha giň gerime eýe bolýandygyny görkezýär. Şeýle hem 2024-nji ýylyň 9-njy dekabrynda Arkadag şäheri ESQR-hil seljerişi boýunça Ýewropa Jemgyýetiniň abraýly «Quality Choice Prize 2024» baýragyna mynasyp boldy. Dabara Wena şäheriniň meşhur «Parkhotel Schönbrunn» myhmanhanasynda geçirildi. Bu halkara çäre «European Society for Quality Research (ESQR)» tarapyndan gurnalyp, şäher ösüşi, saglygy goraýyş hem-de energiýanyň netijeliligi ýaly ugurlarda hil dolandyryşynda gazanylan üstünliklerini görkezýär. Ýurdumyzda ýerleşýän öňdebaryjy «akylly» we durnukly şäher bolan Arkadag şäheri innowasion şäher gurluşygyna we ýokary hili standartlara bolan ygrarlylygy üçin sylaglandy.

Şeýle hem şäher gurluşygynda türkmen telekeçilerimize ynam bildirilmegi we türkmen telekeçilerimiziň ýurdumyzda öndürilýän gurluşyk önümleriniň ulanylmagy aýratyn uly ähmiýete eýe boldy. Türkmenistanyň Prezidentiniň 2015-nji ýylyň 9-njy iýulyndaky «Türkmenistanda dürli görnüşli elektron enjamlary öndürýän kärhanalary döretmegiň Döwlet maksatnamasyny tassyklamak hakynda» çykaran 14330 belgili karary esasynda döredilen, Türkmenistan boýunça ýokary tehnologiýaly we döwrebap elektronika enjamlaryny öndüriji kärhanalaryň biri bolan «Aýdyň Gijeler» hojalyk jemgyýetiniň milli ykdysadyýetimiziň ähli ulgamlarynda halkara standartlaryna laýyk gelýän täze innowasion tehnologiýalary, kompýuterleri we yşyklandyryş ulgamynda LED lampalary we asma yşyklandyryjylary, swetaforlary, ýol görkeziji yşaratlarynyň «akylly» şäher Arkadag şäherinde hem ulanylmagy we kärhananyň häzirki wagtda hem 18 görnüş elektrotehnika enjamlaryny öndürmegi döwrebap önümçiliginiň dünýä ülňülerine laýyk gelýändiginiň aýdyň subutnamasy bolup durýar. Şeýle ajaýyp mümkinçilikleriň döredilip berilmegi bolsa türkmen telekeçilerini has-da guwandyrýar,buýsandyrýar.

Umumy adamzat parahatçylygyny üpjün etmekde oňyn halkara başlangyçlary öňe sürýän türkmen halkynyň Milli Lideri Gahryman Arkadagymyzyň, ata Watanymyzyň abraý-mertebesini bütin dünýäde dabaralandyryp, milli ykdysadyýetimiziň kuwwatyny halkara ölçeglerine laýyklykda ösdürýän hormatly Prezidentimiziň janlary sag, belent başlary aman bolsun, tutýan tutumly işleri rowana ýollarda elmydama rowaçlyklara beslensin!