Şu gün Türkmenistanyň Senagatçylar we telekeçiler partiýasynyň edara binasynyň mejlisler jaýynda Türkmenistanyň Senagatçylar we telekeçiler partiýasynyň Merkezi Geňeşiniň hem-de Türkmenistanyň Senagatçylar we telekeçiler birleşmesiniň bilelikde gurnamagynda Gahryman Arkadagymyz Gurbanguly Berdimuhamedowyň “Ömrümiň manysy” atly täze kitabynyň tanyşdyrylyş dabarasy geçirildi.

Maslahatda çykyş edenler maslahatyň dowamynda Gahryman Arkadagymyzyň halkymyza peşgeş beren täze “Ömrümiň manysy” atly kitabynyň çuňňur durmuşy-filosofiki many mazmuna eýedigi barada belläp, Gahryman Arkadagymyzyň bu kitaby şu güne çenli toplan baý biliminiň hem-de tejribesinden gelip çykýan ylmyny umumylaşdyryp halkymyz üçin düşnükli dilde beýan edip döreden eseriniň halkymyz üçin kämilleşmäge, ruhy we medeni dünýäsini beýgeltmäge uly ýardam etjekdigini bellediler.

Maslahatyň ahyrynda oňa gatnaşanlar bize peşgeş beren ajaýyp sowgady üçin Gahryman Arkadagymyza köp sag bolsunlaryny aýdyp, onuň galamynyň has hem ýiti bolmagyny hem-de janynyň sag, ömrüniň uzak bolmagyny tüýs ýürekden arzuw etdiler.