Türkmenistanyň Senagatçylar we telekeçiler partiýasynyň hem-de Türkmenistanyň Senagatçylar we telekeçiler birleşmesiniň bilelikde gurnamagynda Halkara parahatçylyk we ynanyşmak ýylynyň şanly wakalaryna bagyşlanan maslahat geçirildi.

Maslahatda Halkara parahatçylyk we ynanyşmak ýylynda ýurdumyzda taryhy ähmiýetli wakalaryň bolup geçýändigi, milli ykdysadyýetiň dürli ugurlarynda belent sepgitlere ýetilýändigi, her bir günümiziň şatlykly wakalara beslenýändigi, toýlarymyzyň toýlara ulaşýandygy dogrusynda täsirli gürrüň edildi. Çykyş edenler 25-nji maýda Aşgabat şäheriniň gününiň dabaralarynyň «Soňky jaň» mynasybetli dabaralara, şeýle-de Türkmen halysynyň baýramynyň toý şatlygyna ulaşyp, halkymyzyň bagtyýarlygyny dünýä äşgär edendigini uly buýsanç bilen bellediler.

Maslahata gatnaşanlar Watanymyzy ösüş-özgertmeleriň ýoly bilen barha öňe alyp barýan hormatly Prezidentimiziň we Gahryman Arkadagymyzyň janlarynyň sag, ömürleriniň uzak bolmagyny, döwletli tutumlarynyň has-da rowaçlanmagyny arzuw etdiler.