“Pähim-paýhas ummany Magtymguly Pyragy” ýylynyň ajaýyp gününde, ýagny fewral aýynyň 28-ne, Türkmenistanyň Jemgyýetçilik guramalarynyň merkezinde baýramçylyk çäresi we döredijilik sergisi geçirildi. Ol Türkmenistanyň Parahatçylyk gaznasynyň müdiriýetiniň, Türkmenistanyň Magtymguly adyndaky Ýaşlar guramasynyň, Türkmenistanyň Senagatçylar we telekeçiler partiýasynyň we ÝUNESKO-nyň işleri barada Türkmenistanyň Milli toparynyň Sekretariatynyň guramagynda geçirildi. Üstümizdäki ýylyň ady bilen utgaşykly we Halkara zenanlar güni mynasybetli geçirilen dabara “Men gözelligi döredýärin” diýlip atlandyryldy. “Adam eli gyzyl gül” diýlişi ýaly, baýramçylyk çäresine gatnaşan myhmanlar öz elleri bilen döreden sungat eserleri, el işleri bilen çykyş etdiler. Döredijilik adamlarynyň, heýkeltaraşlaryň, zergärleriň, medeniýet işgärleriniň özboluşly ajaýyp sungat eserleri, milliligimiziň gymmatlygy bolan nepis halylarymyz, gyz-gelinlerimiziň çeper el işleri döredijilik sergisiniň esasy bezegi boldy. Baýramçylygyň dowamynda gutlaglar aýdylyp, goşgular okaldy, dana şahyrymyz Magtymguly Pyragynyň sözlerine döredilen çuň manyly aýdymlar aýdyldy. Toýlary toýlara ulaşýan eziz Diýarymyzda halkymyzy asuda, parahat durmuşda ýaşadýan Arkadagly Gahryman Serdarymyzyň adyna alkyşlar aýdyldy.