2023-nji ýylyň 24-nji maýynda Türkmenistanyň Senagatçylar we telekeçiler partiýasynyň Daşoguz welaýat komitetiniň guramagynda welaýat kitaphanasynyň mejlisler jaýynda Aşgabat şäheriniň güni mynasybetli “Aşgabat syýasy gatnaşyklaryň merkezi” atly maslahaty geçirildi. Merkezi Aziýanyň merjen şäheri ak şäherimiz Aşgabat häzirki döwürde Hormatly Prezidentimiziň parasatly baştutanlygynda sebitde ylalaşdyryjy merkez hasaplanýar. Ginnesiň rekordlar kitabyndan orun alan merjen paýtagtymyz ikitaraplaýyn we köptaraplaýyn gepleşikleriň geçirilýän ýeri, parahatçylygyň we düşünişmegiň merkezi hökmünde tanalýar. Maslahatyň dowamynda paýtagtymyzda geçirilýän halkara maslahatlarynyň, forumlaryň, ikitaraplaýyn we köptaraplaýyn gepleşikleriň ýurdumyzyň halkara abraýynyň has-da artmagynda eýeleýän orny dogrusynda bellenilip geçildi. Şeýle hem günsaýyn ösýän, özgerýän bedew bady bilen batly ädimler bilen öňe barýan eziz diýarymyzda amala aşyrylýan bu işler halkymyzyň abadan bol-elin durmuşda ýaşamagy üçin oňaýly şertleri döredýändigi hakynda çykyş edenler öz çykyşlarynda belläp geçdiler. Maslahat Hormatly Prezidentimize, Türkmen halkynyň Milli Lideri Gahryman Arkadagymyza mähriban Watanymyzy ösdürmek, halkymyzy abadan durmuşda ýaşatmak ugrunda alyp barýan giň gerimli işleri üçin sag bolsun sözleri bilen jemlendi.