Türkmenistanyň Senagatçylar we telekeçiler partiýasynyň Balkan welaýat komitetiniň gurnamagynda Senagatçylar we telekeçiler birleşmesiniň welaýat bölüminiň mejlisler jaýynda “Arkadagly Gahryman Serdarymyz bilen belent maksatly beýik ösüşler” atly maslahat duşuşygy geçirildi.

Onda Berkarar döwletiň täze eýýamynyň Galkynyşy döwründe jemgyýetçilik guramalarynyň öňünde durýan wezipeler, ýurdumyzda amala aşyrylýan milli maksatnamalaryň, Hormatly Prezidentimiziň welaýatymyza amala aşyran iş sapary, welaýatda täze energetika we medeni-durmuş maksatly desgalaryň ulanmaga berilmegi hem-de düýbüniň tutulmagy mynasybetli dabaralara gatnaşmagynyň taryhy ähmiýeti barada buýsançly çykyşlara giň orun berildi. 

 Duşuşyga ahyrynda döwletli döwranymyzyň, baky bagtyýarlygymyzyň baş sakasynda durýan halkymyz hakynda ägirt uly tagallalar edýän  Gahryman Arkadagymyzyň, Arkadagly Gahryman Serdarymyzyň belent tutumly işleriniň elmydama rowaç bolmagyny arzuw etdiler.