2023-nji ýylyň 17-nji maýynda Türkmenistanyň Senagatçylar we telekeçiler partiýasynyň mejlisler jaýynda Türkmenistanyň Senagatçylar we telekeçiler partiýasynyň gurnamagynda “Türkmenistan we Täjigistan döwletara gatnaşyklaryň taryhynda täze sahypany açýar” atly maslahat geçirildi. Maslahatyň barşynda Hormatly Prezidentimiz Serdar Berdimuhamedowyň “Arkadag Serdarly bagtyýar ýaşlar” ýylymyzyň 10 — 11-nji maýda Täjigistan Respublikasyna bolan döwlet saparynyň guwandyryjy üstünliklere beslenmegi Garaşsyz, hemişelik Bitarap Watanymyzyň taryhyna altyn harplar bilen ýazyldygy barada belläp, Hormatly Prezidentimiz Arkadagly Serdarymyzyň Täjigistan Respublikasyna amala aşyran ilkinji döwlet sapary dostluk, ynanyşmak we özara goldaw bermek ýörelgelerine esaslanýan türkmen-täjik gatnaşyklarynyň ösdürilmeginde taryhy ähmiýete eýe boldy diýip buýsanç bilen belläp geçdiler. Saparyň öňüsyrasynda Duşenbede geçirilen Türkmen-täjik işewürlik maslahatynyň, bilelikdäki işewürlik geňeşiniň birinji mejlisiniň we iki ýurduň eksport ugurly harytlarynyň sergisiniň hem özara bähbitli döwletara hyzmatdaşlygyň mundan beýläk-de ösdürilmegine gönükdirilendigini bellemek gerek. Şeýle hem, şol gün bu ýerde Täjigistan Respublikasynyň we Türkmenistanyň ylmy intelligensiýasynyň wekilleriniň gatnaşmagynda “Tegelek stoluň” başyndaky halkara maslahat boldy. Onda ikitaraplaýyn ylmy-tehniki hyzmatdaşlygyň geljekki ugurlary ara alnyp maslahatlaşyldy. Maslahatyň dowamynda çykyş edenler Hormatly Prezidentimiz Arkadagly Serdarymyzyň döwlet sapary, Täjigistan Respublikasynyň Prezidenti we täjik parlamentiniň ýolbaşçylary bilen geçiren ýokary derejedäki gepleşikleri dostluk, hoşniýetlilik we özara bähbitli hyzmatdaşlyk ýörelgelerine esaslanýan türkmen-täjik gatnaşyklarynyň mundan beýläkki ösüşlerine kuwwatly itergi berjekdigi barada uly buýsanç bilen gürrüň etdiler.