2022-nji ýylyň 2-nji sentýabrynda Türkmenistanyň Senagatçylar we telekeçiler partiýasynyň Merkezi Geňeşiniň hem-de Türkmenistanyň Senagatçylar we telekeçiler birleşmesiniň bilelikde gurnamagynda partiýanyň edara binasynyň mejlisler jaýynda “Garaşsyzlyk ýyllarynda ýurdumyzda hususy ulgamda gazanylan belent sepgitler” atly maslahat geçirildi. Bu maslahata Türkmenistanyň Senagatçylar we telekeçiler birleşmesiniň agzalary, öňdebaryjy telekeçiler we Türkmenistanyň Senagatçylar we telekeçiler partiýasynyň işjeň agzalary gatnaşdylar. Maslahatyň çäklerinde ýurdumyzyň hususy pudagynyň wekilleriniň gazanan üstünliklerini şöhlelendirýän serginiň gurnalmagy has-da täsirli boldy. Maslahatyň dowamynda edilen çykyşlarda Garaşsyzlygyň özbaşdak döwletliligimiziň, bagtyýarlygymyzyň, berkararlygymyzyň gözbaşydygy, Garaşsyzlyk ýyllarynda türkmen telekeçileriniň ýeten belent sepgitleri, milli ykdysadyýetimizde we beýleki pudaklarda ýetilen guwandyryjy netijeler, amala aşyrylan taryhy özgertmeler, şanly Garaşsyzlygymyzyň 31 ýyllyk baýramçylygynyň bellenilýän “Halkyň Arkadagly zamanasy” ýylynda türkmen telekeçileri tarapyndan ýurdumyzyň dürli künjeklerinde medeni durmuş maksatly binalaryň, bilim edaralarynyň onlarçasynyň gurlup ulanylmaga berlendigi barada durlup geçildi. Her bir güni parahatçylyga, ynsanperwerlige ýugrulan döwlet syýasatymyzyň netijesinde ýurdumyz uly üstünliklere beslenýär, merdana halkymyzyň Hormatly Prezidentimiziň baştutanlygynda gazanýan şöhratly ýeňişleriniň,bagtyýarlykda tutýan toý baýramlarynyň dabarasy dünýä dolýar diýlip,çykyşlarda bellenildi. Maslahatyň ahyrynda oňa gatnaşyjylar türkmen işewürlerine döredip berýän giň mümkinçilikleri üçin Hormatly Prezidentimiziň adyna alkyş sözlerini aýtdylar.