Türkmenistanyň Senagatçylar we telekeçiler partiýasynyň Aşgabat şäher we Ahal welaýat komitetleriniň bilelikde gurnamagynda «Halk Maslahatynyň çözgütleri – pähim-paýhasly syýasat we röwşen geljek» atly wagyz-nesihat çäresi geçirildi. Türkmenistanyň Halk Maslahatynyň mejlisleri ýurdumyzyň jemgyýetçilik-syýasy durmuşynda taryhy wakalara öwrülip, döwletimiziň ösüşiniň täze basgançaklaryny kesgitleýär. Ýurdumyzyň durmuşynda möhüm orun eýeleýän bu wajyp forumda kabul edilýän çözgütler berkarar döwletimiziň durmuş-ykdysady binýadyny pugtalandyrmaga we halkymyzyň ýaşaýyş-durmuş derejesini ýokarlandyrmaga gönükdirilendir. Halk maslahaty – bu milli demokratik ýörelgeleriň, milletiň agzybirliginiň we döwlet bilen halkyň arasyndaky pugta baglanyşygyň aýdyň beýanydyr. Maslahatda kabul edilýän çözgütler diňe bir gysga möhletli meýilnamalary däl, eýsem ýurdumyzyň uzak möhletleýin strategiýasyny hem öz içine alýar. Halk Maslahatynyň pähim-paýhasly çözgütleri döwletimiziň gülläp ösmegine we parahatçylykda ýaşamagyna hyzmat edýär. Bu taryhy kararlar her bir türkmen raýatyny täze zähmet üstünliklerine, Watana bolan söýgini iş ýüzünde görkezmäge we röwşen geljegimizi bilelikde gurmaga ruhlandyrýar. Çäräniň ahyrynda gatnaşyjylar halkymyzyň bagtyýar durmuşy, ýurdumyzyň mundan beýläk-de gülläp ösmegi ugrunda yzygiderli alada edýän Türkmen halkynyň Milli Lideri Gahryman Arkadagymyza hem-de Hormatly Prezidentimiz Arkadagly Serdarymyza çuňňur hoşallyklaryny beýan etdiler.