Şu gün Türkmenistanyň Senagatçylar we telekeçiler partiýasynyň Aşgabat şäher komitetiniň, Türkmenistanyň Ekologiýa hereketi jemgyýetçilik guramasynyň bilelikde gurnamagynda partiýanyň mejlisler jaýynda Daşky gurşawy goramagyň bütindünýä güni mynasybetli maslahat duşuşygy geçirildi.

Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň baştutanlygynda ýurdumyzda daşky gurşawy goramaga, tebigy baýlyklary rejeli peýdalanmaga gönükdirilen toplumlaýyn işler alnyp barylýar. Eziz Diýarymyzda biologiki köpdürlüligi we tebigy aýratynlygy saklamak, çölleşmä we topragyň şorlaşmagyna garşy göreşmek babatda iri möçberli taslamalar amala aşyrylýar. Türkmenistanda BMG-niň Ösüş maksatnamasy, BMG-niň Daşky gurşaw boýunça maksatnamasy hem-de beýleki abraýly halkara düzümler bilen bilelikde milli, sebit derejelerinde ekologiýa maksatnamalarynyň we taslamalarynyň onlarçasy amala aşyrylýar.

Milli hem-de ählumumy derejede ekologiýa abadançylygyny üpjün etmek maksady bilen, ýurdumyzda toplumlaýyn we uzak möhletleýin Milli tokaý maksatnamasy üstünlikli durmuşa geçirilýär. Onda senagat düzüminiň, ulag-kommunikasiýalar ulgamynyň ösmegi, şäheriň we täze ilatly ýerleriň döremegi bilen baglylykda, ýaşyl zolaklaryň we tokaýlaryň döredilmegi göz öňünde tutulýar. Bu babatda Köpetdagyň etegindäki ajaýyp künjekde gurlan Arkadag şäheriniň gurulmagy aýdyň mysaldyr. Täze şäher sanly, maglumat-aragatnaşyk ulgamlara we «ýaşyl» tehnologiýalara esaslanýan «akylly» şäher bolmak bilen, bu ýerde ýaşyl ekologiýa aýratyn üns berilýär. Desgalaryň gurluşygynda ekologiýa taýdan arassa serişdeleriň ulanylmagy Arkadag şäherine «Ýewropada Howpsuzlyk we Hyzmatdaşlyk Guramasynyň sebitine durnukly, «ýaşyl» howa üçin oňaýly we innowasion çözgütli şäherleri ösdürmek» taslamasyna goşulýandygy baradaky güwänama eýe bolmagyna hem-de bu ugurda öňde goýlan wezipeleriň üstünlikli çözülmegine getirdi.