Hormatly Prezidentimiziň parasatly baştutanlygynda  Berkarar döwletimiziň bagtyýarlyk döwründe  ýurdumyzy hemmetaraplaýyn ösdürmekde, halkymyzyň ýaşaýyş-durmuş derejesini, maddy hal ýagdaýyny has-da gowulandyrmakda hem-de  dünýäniň ösen döwletleriniň  hataryna çykarmakda  uly işler durmuşa geçirilýär. Milli ykdysadyýetimiziň oba hojalyk  toplumyny, aýratyn hem onuň köpugurly gaýtadan işleýän pudagyny, eýeçiligiň dürli görnüşlerini, şol sanda  hususyýetçiligi ösdürmäge  düýpli maýa goýumlary goýulýar.. Şeýle beýik işleriň ählisi hem Gahryman Arkadagymyzyň ýurdumyzy ösdürmegiň esasy özenine öwren “Döwlet adam üçindir!” diýen baş ýörelgesinden gözbaş  alýar.

Hormatly Prezidentimiziň taýsyz tagallalary netijesinde berkarar Watanymyzy hemmetaraplaýyn gülläp ösýän ýurda  öwürmekde gazanylýan guwandyryjy üstünliklere döwletli Diýarymyzyň zähmetsöýer telekeçileri hem özleriniň mynasyp goşantlaryny goşýarlar. 2020-nji ýylyň güýz paslynyň ahyrynda Balkanabat şäheriniň golaýynda  ýokary hil ülňülerine  laýyk gurlup, işe girizilen döwrebap ýyladyşhana hem Arkadag Prezidentimiziň şeýle giň möçberli  toplumlaýyn  aladalarynyň ajaýyp miweleriniň biridir. Täze 2022-nji ýylyň, “Halkyň Arkadagly zamanasy” ýylynyň häzirki günlerinde bolsa bu döwrebap  ýyladyşhanada  ýetişdirilen pomidor hasyly ýygnalyp, içerki we daşarky bazarlaryň sarp edijilerine yzygiderli ugradylýar.

          Uly Balkan dagynyň degresindäki gurply toprakly Düzmergen ýaýlasynda bina edilen bu häzirki zaman ýyladyşhanasy      Türkmenistanyň Senagatçylar we telekeçiler birleşmesiniň hem-de Senagatçylar we telekeçiler partiýasynyň agzasy Telekeçi Halmämmet Amanmämmedowa degişlidigini aýratyn bellenmäge mynasypdyr. Berkarar döwletimiziň bagtyýarlyk döwründe il-ulsumyzyň eşretli, bolelin durmuşda ýaşamagy, raýatlarymyzyň öz topragymyzda  ýetişdirilýän dürli  gök önümler  bilen ýylyň  tutuş  dowamynda ygtybarly üpjün edilmegi, şunda hususy pudagyň ägirt uly mümkinçilikleriniň netijeli peýdalanylmagy babatda Gahryman Arkadygymyzyň edýän uly aladalaryna  mynasyp goşant  goşmak bu ýyladyşhananyň  eýesi  bolan işewür telekeçiniň baş  maksady bolup durýar. Ýyladyşhananyň önümçilik mümkinçilikleri bagtyýarlyk döwrümizde hususy pudagyň  okgunly ösüşlere eýe bolýandygyny ýene bir gezek ähli aýdyňlygy bilen görkezýär. Sebäbi daşary ýurtlarda öndürilen  ösen enjamlar bilen birkemsiz  üpjün edilen  ýyladyşhanada ähli  işler kuwwatly  tehnologiýalara, netijeli işläp taýýarlamalara  hem-de  kämil kompýuterlere  daýanýar. Munuň  özi ýyladyşhananyň  ýylylyk, çyglylyk, suwaryş  ulgamlarynyň  işlerini talabalaýyk  ýola goýmakda  hem möhüm ähmiýete  eýe bolup durýar.

         Gök önümleriň dürli görnüşlerini ösdürip ýetişdirmäge niýetlenen, ekerançylyk meýdany 4 gektara, umumy tutýan meýdany bolsa 5 gektara  barabar bolan ýyladyşhana  täze iş orunlarynyň birbada altmyşa golaýyny döretmäge mümkinçilik berdi. Bu ýyladyşhanada  agrotehnikanyň talaplaryna  laýyk ýetişýän  pomidorlary ýygnamak işi “Halkyň Arkadagly zamanasy” diýlip atlandyrylan  şu ýylyň  iýun aýynyň  ortalaryna çenli  dowam eder. Şeýlelikde,  ýyladyşhanadan tutuş  möwsümiň dowamynda  alynjak pomidor  hasylynyň  umumy möçberi bir müň tonna barabar bolar. Bu bolsa  şu ýerdäki pomidor  düýpleriniň her birinden  möwsümiň dowamynda alynjak  hasylyň 7 kilogramdan 17 kilograma çenli boljakdygyny tassyklaýar. 

Ýeri gelende aýtsak, bu  ýerde ýetişdirilýän pomidorlar mineral dökünler bilen baýlaşdyrylan suw bilen suwarylýar. Syzylyp çykýan artykmaç suw bolsa  ýörite akarjyklaryň kömegi bilen  bir ýere toplanyp,  tejribeli telekeçiniň ýyladyşhanasynyň golaýyndaky bäş gektar meýdanda  kemala getiren  5 müň 500 düýp dürli miweli  agaçlaryny suwarmakda  netijeli ulanylýar. Ussat telekeçiniň häzirki wagtda miweli baglaryndan 750 sany düýp garaly, 500 sany düýp ülje, 750 sany düýp alma, 250 sany düýp pisse, 750 sany düýp şetdaly, 500 sany düýp alça, 500 sany düýp çereşnýa, 250 sany düýp hurma, 500 sany düýp armyt, 750 sany düýp erik agaç nahallary ekilen, jemi 5 500 sany miweli baglary ösdürilip ýetişdirilýär. Bu işleriň amala aşyrylmagy miweli agaçlaryň hasyllylygyny ýokarlandyrmaga hem oňyn mümkinçilik berýändigini  ylmy tejribeler tassyklaýar. Şeýle-de alyp barýan işlerine  döredijilikli çemeleşýän ezber telekeçi geljekde ýyladyşhanada ýetişdirýän gök önümleriniň  görnüşlerini köpeltmegi  hem-de olardan  alynýan önümler üçin  gaýtadan işleýän  önümçiligi ýola goýmagy maksat edinýär. Ýyladyşhanada ýokary hil ülňülerine laýyklykda  ekologiýa taýdan arassa ýetişdirilýän pomidor hasylyna diňe bir  içerki bazarlarymyza däl, eýsem daşary ýurtlarda hem uly isleg bildirilýär. Muňa ussat telekeçiniň bäsdeşlige ukyplylygy bilen tapawutlanýan pomidorlarynyň Russiýa Federasiýasyna ugradylyp Başlanmagam  doly şaýatlyk edýär. 

 “Halkyň Arkadagly zamanasy” diýlip yglan edilen 2022-nji  ýylda buýsançly gadam urýan  halkymyzyň toý saçaklarynyň rysgal-bereketli  bolmagyna mynasyp goşant goşmagy başarýan ussat telekeçiniň döwrebap ýyladyşhanasynda şu günler hasyl ýygnamak işleri guramaçylykly dowam edýär. Biziň  Balkan welaýat partiýa komitetimiziň agzybir işgärleri bolsa bu ýerlerde bolup, ýerli telekeçileriň we ýyladyşhanada zähmet çekýän hünärmenleriň arasynda wagyz-ündew işleri yzygiderli alyp barýarlar. Ýyladyşhananyň   agzybir hünärmenleri hem öz gezeginde arassa, halal zähmet çekip, bol hasyl almaga we kärhananyň önümçilik kuwwatlylygyny artdyrmaga döredip berýän  giň şertlerdir mümkinçilikleri üçin Gahryman Arkadagymyza tükeniksiz alkyş we hoşallyk sözlerini aýdýarlar.