ПАРТИЯ ПРОМЫШЛЕННИКОВ И ПРЕДПРИНИМАТЕЛЕЙ ТУРКМЕНИСТАНА
Häzirki döwürde bütin dünýäde sporty we bedenterbiýäni ösdürmek, adamlaryň sagdyn durmuş ýörelgesine eýermegini gazanmak, halkara ýaryşlary guramaçylykly geçirmek boýunça giň gerimli işler alnyp barylýar. Berkarar Watanymyzda hem köpçülikleýin bedenterbiýe sagaldyş hereketine halkyň saglygyny berkitmegiň, hususan-da, ýaş nesilleriň beden we ruhy taýdan kämilligini gazanmagyň möhüm şertleriniň biri hökmünde garalýar. Degişli ugurdaky döwlet syýasaty raýatlaryň durmuşynyň hilini gowulandyrmaga, sagdyn durmuş ýörelgesini kemala getirmäge, beden we ruhy taýdan kämil nesli terbiýelemäge,halkara sport ýaryşlarynda üstünlikli çykyş edýän türgenleri taýýarlamaga gönükdirilýär.
Hormaty Prezidentimiz «Ýaşlar - Watanyň daýanjy» atly kitabynda: «Täze taryhy eýýamda sagdyn durmuş ýörelgesine eýerýän ildeşlerimiziň hatary yzygiderli artýar, köpçülikleýin bedenterbiýe-sagaldyş hereketi barha rowaçlanýar. Munuň özi nesil sagdynlygyny gazanmakda ähmiýet berilmeli ýagdaýdyr. Şonuň bilen birlikde, ol ýokary netijeli sporty ösdürmegiň hem esasy şertleriniň biridir» diýip belleýär. Bu jemgyýetimizde bedenterbiýäni we sporty ösdürmek boýunça döwlet derejesinde alnyp barylýan giň gerimli işleriň esasy maksadyny görkezýär.
Ýurdumyzda bedenterbiýe we sport ulgamynyň kanunçylyk binýadyny berkitmek bilen birlikde, jemgyýetiň sagdynlygyny goramakda giň gerimli hem-de anyk maksatlara gönükdirilen çäreleriň yzygiderli geçirilmegine aýratyn ähmiýet berilýär. Köpçülikleýin welosipedli ýörişleriň, orta hünär we ýokary okuw mekdeplerinde bilim alýan talyp ýaşaryň gatnaşmagynda Uniwersiadalaryň, ykdysadyýetiň dürli ugurlarynda zähmet çekýän hünärmenleriň arasynda Spartakiadalaryň yzygiderli geçirilmegi asylly däbe öwrüldi. Şunuň bilen birlikde, ýurdumyzda iri halkara ýaryşlaryň yzygiderli geçirilmegi hem sporty we sagdyn durmuş ýörelgesini hemra edinýän ildeşlerimiziň sanynyň barha artmagynda diýseň ähmiýetlidir. Paýtagtymyzda soňky birnäçe ýylda üstünlikli geçirilen Ýapyk
binalarda we söweş sungaty boýunça V Aziýa oýunlary, Agyr atletika boýunça dünýä çempionaty, Kuraş boýunça dünýä çempionaty ýaly iri ýaryşlaryň tejribesi hem bu hakykaty doly tassyklaýar.
Şemşat Baýramgeldiýewa, Türkmenistanyň Senagatçylar we telekeçiler partiýasynyň Aşgabat şäher komitetiniň umumy bölüminiň müdiri.
